34ਵਾਂ ਸੁਰਜੀਤ ਹਾਕੀ ਟੂਰਨਾਮੈਂਟ: ਦੇਖੋ ਮੈਚਾਂ ਦੀ ਸੂਚੀ

ਭਾਰਤ ਦਾ ਨਾਮੀ 34ਵਾਂ ਇੰਡੀਅਨ ਆਇਲ ਸੁਰਜੀਤ ਹਾਕੀ ਟੂਰਨਾਮੈਂਟ ਸਥਾਨਕ ਉੁਲੰਪੀਅਨ ਸੁਰਜੀਤ ਸਿੰਘ ਹਾਕੀ ਸਟੇਡੀਅਮ, ਬਲਟਰਨ ਪਾਰਕ ਵਿਖੇ 23 ਅਕਤੂਬਰ ਤੋਂ ਖੇਡਿਆ ਜਾਵੇਗਾ।

ਜਿਲ੍ਹੇ ਦੇ ਡਿਪਟੀ ਕਮਿਸ਼ਨਰ ਤੇ ਸੁਰਜੀਤ ਹਾਕੀ ਸੁਸਾਇਟੀ ਜਲੰਧਰ ਦੇ ਪ੍ਰਧਾਨ ਸ੍ਰੀ ਵਰਿੰਦਰ ਕੁਮਾਰ ਸ਼ਰਮਾ ਇਹ ਟੂਰਨਾਮੈਂਟ ਹਰ ਸਾਲ ਭਾਰਤੀ ਹਾਕੀ ਟੀਮ ਦੇ ਸਾਬਕਾ ਕਪਤਾਨ ਅਤੇ ਉਲੰਪੀਅਨ ਸਰਦਾਰ ਸੁਰਜੀਤ ਸਿੰਘ ਦੀ ਯਾਦ ਵਿੱਚ ਕਰਵਾਉਂਦੇ ਹਨ | ਸੁਰਜੀਤ ਸਿੰਘ ਦੀ 7 ਜਨਵਰੀ 1984 ਨੂੰ ਜਲੰਧਰ ਨਜ਼ਦੀਕ ਇਕ ਸੜਕ ਹਾਦਸੇ ਵਿਚ ਮੌਤ ਹੋ ਗਈ ਸੀ। ਪਨਾਲਟੀ ਕਾਰਨਰ ਦੇ ਬਾਦਸ਼ਾਹ ਕਹੇ ਜਾਣ ਵਾਲੇ ਸ੍ਰ. ਸੁਰਜੀਤ ਸਿੰਘ ਨੇ ਹਾਕੀ ਦੇ ਮਿਆਰ ਨੂੰ ਉੱਚਾ ਚੁੱਕਣ ਲਈ ਆਖਰੀ ਦਮ ਤੱਕ ਲੜਾਈ ਜਾਰੀ ਰੱਖੀ ਸੀ।

ਲਗਾਤਾਰ 9 ਦਿਨ ਚੱਲਣ ਵਾਲੇ ਇਸ ਸਮਾਗਮ ਤੇ ਮਰਦਾਂ ‘ਤੇ ਮਹਿਲਾਵਾਂ ਦੇ ਵਰਗ ਦਾ ਟੂਰਨਾਮੈਂਟ 23 ਤੋਂ 31 ਅਕਤੂਬਰ ਤੱਕ ਖੇਡਿਆ ਜਾਵੇਗਾ। ਲੀਗ-ਕਮ-ਨਾਟ ਆਊਟ ਅਧਾਰ ‘ਤੇ ਖੇਡੇ ਜਾਣ ਵਾਲੇ ਇਸ ਟੂਰਨਾਮੈਂਟ ਦੇ ਮਰਦਾਂ ਦੇ ਵਰਗ ਵਿੱਚ ਪਿਛਲੇ ਸਾਲ ਦੀ ਚੈਂਪੀਅਨ ਪੰਜਾਬ ਨੈਸ਼ਨਲ ਬੈਂਕ ਦਿੱਲੀ, ਉਪ-ਜੈਤੂ ਇੰਡੀਅਨ ਆਰਮੀ ਸਮੇਤ ਕੁੱਲ 12 ਟੀਮਾਂ ਜਿਹਨਾਂ ਵਿੱਚ ਭਾਰਤ ਪੈਟਰੋਂਲੀਅਮ ਮੁੰਬਈ, ਓ.ਐਨ.ਜੀ.ਸੀ.ਦਿੱਲੀ, ਕੈਗ ਦਿੱਲੀ, ਭਾਰਤੀ ਹਵਾਈ ਸੈਨਾ, ਦਿੱਲੀ, ਭਰਤੀ ਨੈਵੀ ਮੁੰਬਈ, ਭਾਰਤੀ ਰੇਲਵੇ ਦਿੱਲੀ, ਪੰਜਾਬ ਪੁਲਿਸ, ਏਅਰ ਇੰਡੀਆ ਮੁੰਬਈ ਅਤੇ ਇੰਡੀਅਨ ਆਇਲ ਮੁੰਬਈ ਦੀਆਂ ਟੀਮਾਂ ਭਾਗ ਲੈਣਗੀਆਂ।

ਮਹਿਲਾਵਾਂ ਦੇ ਵਰਗ ਵਿੱਚ ਪਿਛਲੇ ਸਾਲ ਦੀ ਚੈਂਪੀਅਨ ਪੰਜਾਬ ਇਲੈਵਨ, ਉਪ-ਜੈਤੂ ਪੱਛਮੀ ਰੇਲਵੇ ਮੁੰਬਈ, ਤੋਂ ਇਲਾਵਾ ਸੈਂਟਰਲ ਰੇਲਵੇਜ਼, ਮੁੰਬਈ ਉੱਤਰੀ ਸੈਂਟਰਲ ਰੇਲਵੇਜ਼ ਇਲਾਹਾਬਾਦ, ਹਰਿਆਣਾ ਇਲੈਵਨ, ਰੇਲ ਕੋਚ ਫੈਕਟਰੀ ਕਪੂਰਥਲਾ, ਤੇ ਯ੍ਵਕੋ ਬੈਂਕ ਦੀਆਂ ਟੀਮਾਂ ਭਾਗ ਲੈਣਗੀਆਂ।

ਸ਼੍ਰੀ ਵਰਿੰਦਰ ਕੁਮਾਰ ਸ਼ਰਮਾ ਨੇ ਅੱਗੇ ਦੱਸਿਆ ਕਿ ਮਰਦਾਂ ਦੇ ਵਰਗ ਵਿੱਚ ਸਾਰੀਆਂ 12 ਟੀਮਾਂ ਨੂੰ ਚਾਰ ਪੂਲਾਂ ਵਿੱਚ ਵੰਡ ਕੇ ਲੀਗ ਦੌਰ ਵਿੱਚ ਰੱਖਿਆ ਗਿਆ ਹੈ ਜਦਕਿ ਹਰ ਪੂਲ ਦੀ ਜੈਤੂ ਟੀਮ ਸੈਮੀਫਾਈਨਲ ਦੌਰ ਵਿੱਚ ਪ੍ਰਵੇਸ਼ ਕਰੇਗੀ। ਮਹਿਲਾਵਾਂ ਦੇ ਵਰਗਾਂ ਵਿੱਚ ਦੋਵੇਂ ਪੂਲਾਂ ਦੀਆਂ ਜੇਤੂ ਤੇ ਉਪ ਜੇਤੂ ਟੀਮਾਂ ਸੈਮੀਫਾਈਨਲ ਵਿੱਚ ਪ੍ਰਵੇਸ਼ ਕਰਨਗੀਆਂ।

ਮਹਿਲਾਵਾਂ ਦੇ ਵਰਗ ਵਿੱਚ ਸੈਮੀਫਾਈਨਲ ਕ੍ਰਮਵਾਰ 27 ਤੇ 28 ਅਕਤੂਬਰ ਨੂੰ ਖੇਡੇ ਜਾਣਗੇ ਮਰਦਾਂ ਦੇ ਵਰਗਾਂ ਵਿੱਚ ਸੈਮੀਫਾਈਨਲ 30 ਅਕਤੂਬਰ ਨੂੰ ਖੇਡੇ ਜਾਣਗੇ ਮਹਿਲਾਵਾਂ ਤੇ ਮਰਦ ਵਰਗ ਦੇ ਫਾਈਨਲ ਮੁਕਾਬਲੇ ਕ੍ਰਮਵਾਰ 29 ਤੇ 31 ਅਕਤੂਬਰ ਨੂੰ ਖੇਡੇ ਜਾਣਗੇ। ਇਸ ਮੁਕਾਬਲੇ ਫਲੱਡ ਲਾਈਟਸ ਵਿੱਚ ਖੇਡੇ ਜਾਣਗੇ ਅਤੇ ਦਰਸ਼ਕਾਂ ਲਈ ਇਹਨਾਂ ਮੈਚਾਂ ਨੂੰ ਦੇਖਣ ਲਈ ਕੋਈ ਦਾਖਿਲਾ ਫੀਸ ਨਹੀਂ ਹੋਵੇਗੀ।

ਸ੍ਰੀ ਸ਼ਰਮਾ ਅਨੁਸਾਰ ਮਰਦਾਂ ਦੇ ਵਰਗ ਵਿੱਚ ਦੋਵੇਂ ਸੈਮੀਫਾਈਨਲ ਅਤੇ ਫਾਈਨਲ ਮੈਚ ਪੀ.ਟੀ.ਸੀ. ਚੈਨਲ ਤੋਂ ਲਾਈਵ ਦਿਖਾਏ ਜਾਣਗੇ ਜਦਕਿ ਆਲ ਇੰਡੀਆ ਰੇਡੀਓ ਜਲੰਧਰ ਬਾਲ-ਟੂ-ਬਾਲ ਕਮੇਂਟਰੀ ਦਾ ਨਾਲੋਂ-ਨਾਲ ਪ੍ਰਸਾਰਣ ਕਰੇਗਾ।

ਚੈਂਪੀਅਨ ਤੇ ਉਪ ਜੇਤੂ ਟੀਮਾਂ ਨੂੰ 10 ਲੱਖ ਤੋਂ ਵੱਧ ਦੇ ਨਗਦ ਇਨਾਮ ਦੇ ਕੇ ਸਨਮਾਨਿਤ ਕੀਤਾ ਜਾਵੇਗਾ। ਇਸ ਤੋਂ ਇਲਾਵਾ ਟੂਰਨਾਮੈਂਟ ਦੇ ਬੈਸਟ ਖਿਡਾਰੀ ਨੂੰ 25,000/- ਰੁਪਏ ਦੇ ਮਹਿੰਦਰ ਸਿੰਘ ਟੁੱਟ ਐਵਾਰਡ ਨਾਲ ਸਨਮਾਨਿਤ ਕੀਤਾ ਜਾਵੇਗਾ। ਜੇਤੂ ਟੀਮ ਨੂੰ 5 ਲੱਖ ਦਾ ਨਗਦ ਇਨਾਮ ਟੁੱਟ ਬ੍ਰਦਰਜ ਅਮਰੀਕਾ ਵੱਲੋਂ ਦਿੱਤਾ ਜਾਵੇਗਾ।

ਸ੍ਰੀ ਸ਼ਰਮਾ ਨੇ ਅੱਗੇ ਦੱਸਿਆ ਕਿ ”ਸੁਰਜੀਤ ਹਾਕੀ ਦੇਖੋ ਆਲਟੋ ਕਾਰ ਜਿੱਤੋ ” ਨਾਅਰੇ ਤਹਿਤ ਇਸ ਸਾਲ ਵੀ ਸੁਰਜੀਤ ਹਾਕੀ ਦੇ ਦਰਸ਼ਕਾਂ ਨੂੰ ਆਲਟੋ ਕਾਰ, ਫਰਿੱਜ਼, ਐਲ.ਸੀ.ਡੀਜ਼, ਮਾਈਕਰੋਵੇਵ, ਕੈਮਰੇ, ਮੋਬਾਈਲ ਆਦਿ ਵਿਸ਼ੇਸ਼ ਐਵਾਰਡ ਰੱਖਿਆ ਗਿਆ ਹੈ ਜੋ ਕਿ ਲਾਟਰੀ ਹਾਕੀ ਟੂਰਨਾਮੈਂਟ ਦੇ ਆਖਰੀ ਦਿਨ ਕੱਢਿਆ ਜਾਵੇਗਾ। ਸ੍ਰੀ ਸ਼ਰਮਾ ਨੇ ਕਿਹਾ ਕਿ ਖਿਡਾਰੀ ਦੇ ਨਾਲ-ਨਾਲ ਦਰਸ਼ਕਾਂ ਨੂੰ ਮਹਿੰਗੇ ਇਨਾਮ ਦੇਣ ਦਾ ਮੁੱਖ ਕਾਰਨਰ ਕੌਮੀ ਖੇਡ ਹਾਕੀ, ਦੀ ਖੇਡ ਵਿੱਚ ਲੋਕਾਂ ਨੂੰ ਵੱਧ ਤੋਂ ਵੱਧ ਜੋੜਨਾ ਹੈ। ਟੂਰਨਾਮੈਂਟ ਦੇ ਤਮਾਮ ਇੰਤਜ਼ਾਮ ਜਿਸ ਵਿੱਚ ਟੀਮਾਂ ਦਾ ਰਹਿਣ-ਸਹਿਣ, ਮੈਡੀਕਲ, ਟਰਾਂਸਪੋਰਟ ਆਦਿ ਦੇ ਪੂਰੇ ਪ੍ਰਬੰਧ ਕਰ ਲਏ ਗਏ ਹਨ।