ਦਿਲਜੀਤ ਅਤੇ ਕ੍ਰਿਤੀ ਦੀ ਆਉਣ ਵਾਲੀ ਫ਼ਿਲਮ ਦੀ ਸ਼ੂਟਿੰਗ ਹੋ ਗਈ ਹੈ ਸ਼ੁਰੂ, ਵੇਖੋ ਤਸਵੀਰਾਂ

ਬਾਲੀਵੁੱਡ ਨੇ ਯਕੀਨੀ ਤੌਰ 'ਤੇ ਪੂਰੇ ਦਿਲ ਨਾਲ ਸਾਡੇ ਪਾਲੀਵੁੱਡ ਸਿਤਾਰਿਆਂ ਦਾ ਸਵਾਗਤ ਕੀਤਾ ਹੈ | ਉਦਾਹਰਨ ਦੇ ਤੌਰ ਤੇ ਪੰਜਾਬੀ ਇੰਡਸਟਰੀ ਦੇ ਸੁਪਰਸਟਾਰ ਦਿਲਜੀਤ ਦੁਸਾਂਝ, ਜਿਨ੍ਹਾਂ ਨੇ ਬੀ-ਟਾਊਨ ਵਿਚ ਆਪਣੀ ਜਗ੍ਹਾ ਬਣਾ ਲਈ ਹੈ ਅਤੇ ਅਸਲ ਵਿਚ ਬਾਲੀਵੁੱਡ 'ਚ ਤੂਫਾਨ ਲਿਆ ਰਹੇ ਨੇ | ਦਿਲਜੀਤ ਨੇ ਆਪਣੇ ਬਾਲੀਵੁੱਡ ਕੈਰੀਅਰ ਦੀ ਸ਼ੁਰੂਆਤ ਉੜਤਾ ਪੰਜਾਬ ਨਾਲ ਕੀਤੀ ਸੀ, ਉਸਦੇ ਬਾਅਦ ਉਹ ਸਾਨੂੰ ਅਨੁਸ਼ਕਾ ਸ਼ਰਮਾ ਦੇ ਨਾਲ ਫਿਲੌਰੀ 'ਚ ਦਿਖੇ ਸੀ | ਹੁਣ, ਉਨ੍ਹਾਂ ਨੇ ਆਪਣੀ ਕਾਬਲੀਅਤ ਨਾਲ ਆਪਣੇ ਲਈ 2018 ਦੀਆਂ ਕੁਝ ਮੁੱਖ ਪ੍ਰੋਜੈਕਟ ਬਟੋਰ ਲਏ ਹਨ|

ਜਦੋਂ ਤਕ ਅਸੀਂ ਸਾਰੇ ਵੈਲਕਮ ਟੂ ਨਿਊਯਾਰਕ ਦੇ ਰਿਲੀਜ ਦੀ ਉਡੀਕ ਕਰ ਰਹੇ ਹਾਂ ਜੋ ਕਿ 23 ਫਰਵਰੀ ਨੂੰ ਰਿਲੀਜ਼ ਹੋ ਰਹੀ ਹੈ, ਦਿਲਜੀਤ Diljit Dosanjh ਨੇ ਕ੍ਰਿਤੀ ਸੇਨਾੱਨ ਦੇ ਨਾਲ ਚੰਡੀਗੜ੍ਹ ਵਿੱਚ 'ਅਰਜੁਨ ਪਟਿਆਲਾ' ਦੀ ਸ਼ੂਟਿੰਗ ਸ਼ੁਰੂ ਕਰ ਦਿਤੀ ਹੈ | 'ਅਰਜੁਨ ਪਟਿਆਲਾ' ਇਕ ਕਾਮੇਡੀ ਫਿਲਮ ਹੈ ਜਿਸ ਨੂੰ ਰੋਹਿਤ ਜੁਗਰਾਜ ਨੇ ਨਿਰਦੇਸ਼ਿਤ ਕੀਤਾ ਹੈ, ਜੋ ਪਹਿਲਾਂ ਹੀ ਸਰਦਾਰ ਜੀ ਚ ਦੁਸਾਂਝ ਦੇ ਨਾਲ ਕੰਮ ਕਰ ਚੁਕੇ ਹਨ |

ਦਿਲਜੀਤ ਇਸ ਫਿਲਮ ਵਿਚ ਇਕ ਛੋਟੇ ਜਿਹੇ ਕਸਬੇ ਦੇ ਮੁੰਡੇ ਦਾ ਕਿਰਦਾਰ ਨਿਭਾਉਂਦੇ ਦਿਖਣਗੇ ਅਤੇ ਕ੍ਰਿਤੀ ਇਕ ਪੱਤਰਕਾਰ ਦੀ ਭੂਮਿਕਾ ਚ ਨਜ਼ਰ ਆਉਣਗੀ | ਫਿਲਮ ਚ ਫਿਲਮ ਫੁਕਰੇ ਤੋਂ ਪ੍ਰਸਿੱਧੀ ਹਾਸਿਲ ਕੀਤੇ ਕਾਮੇਡੀਅਨ, ਵਰੁਣ ਸ਼ਰਮਾ ਨੂੰ ਇੱਕ ਮਹੱਤਵਪੂਰਨ ਭੂਮਿਕਾ ਵਿਚ ਦੇਖਿਆ ਜਾਏਗਾ | ਕ੍ਰਿਤੀ ਸੇਨਾੱਨ ਨੇ ਹਾਲ ਹੀ ਆਪਣੇ ਇੰਸਟਾਗ੍ਰਾਮ ਅਕਾਊਂਟ ਤੇ ਇਸ ਫਿਲਮ ਦੀ ਇਕ ਝੱਲਕ ਨੂੰ ਸਾਂਝਾ ਕੀਤੀ ਹੈ ਜਿਸ ਵਿਚ ਦਿਲਜੀਤ ਦੁਸਾਂਝ ਨੂੰ ਇੱਕ ਪੁਲਿਸ ਦੇ ਕਿਰਦਾਰ 'ਚ ਦੇਖਿਆ ਜਾ ਸਕਦਾ ਹੈ | ਉਨ੍ਹਾਂ ਦੇ ਇਸ ਸ਼ਾਨਦਾਰ ਪ੍ਰਦਰਸ਼ਨ ਦੀ ਕਾਫੀ ਤਾਰੀਫ ਹੋ ਰਹੀ ਹੈ |

ਪਾਲੀਵੁੱਡ ਫਰੰਟ 'ਤੇ, ਦਿਲਜੀਤ ਦੁਸਾਂਝ ਦੀ ਫਿਲਮ ਸੱਜਣ ਸਿੰਘ ਰੰਗਰੂਟ ਦੇ ਟ੍ਰੇਲਰ ਨੂੰ ਇਸ ਮਹੀਨੇ ਦੇ ਸ਼ੁਰੂ ਵਿਚ ਰਿਲੀਜ਼ ਕੀਤਾ ਗਿਆ ਸੀ, ਜਿਸ ਨੇ ਯੂ ਟੀਊਬ 'ਤੇ 50 ਲੱਖ ਵਿਊਜ਼ ਤੋਂ ਜ਼ਿਆਦਾ ਪ੍ਰਾਪਤ ਹੋਏ ਹਨ | ਨਾਲ ਹੀ ਉਨ੍ਹਾਂ ਦੀ ਇਕ ਹੋਰ ਫਿਲਮ, ਹਾਕੀ ਲੇਜੇਂਡ ਸੰਦੀਪ ਸਿੰਘ ਦੀ ਬਾਇਓਪਿਕ, "ਸੂਰਮਾ" ਜੋ 29 ਜੂਨ 2018 ਨੂੰ ਰਿਲੀਜ਼ ਹੋਣ ਵਾਲੀ ਹੈ, ਜਿਸ ਵਿਚ ਉਨ੍ਹਾਂ ਦੇ ਨਾਲ ਮੁੱਖ ਭੂਮਿਕਾ ਵਿਚ ਤਾਪਸੀ ਪੰਨੂੰ ਦਿਖਾਈ ਦੇਣਗੀ |