ਅੱਜ ਹੈ ਕਾਦਰ ਖ਼ਾਨ ਦਾ ਜਨਮ ਦਿਨ, ਮੌਤ ਤੋਂ ਪਹਿਲਾਂ ਸਿਰਫ ਇਹ ਹੀ ਕਹਿ ਸਕੇ ਸਨ ਕਾਦਰ ਖ਼ਾਨ

ਸ਼ਬਦਾਂ ਦੇ ਸ਼ਹਿਨਸ਼ਾਹ, ਵਧੀਆ ਕਮੇਡੀਅਨ ਦੇ ਤੌਰ ਤੇ ਜਾਣੇ ਜਾਂਦੇ ਕਾਦਰ ਖ਼ਾਨ ਦਾ ਅੱਜ ਜਨਮ ਦਿਨ ਹੈ । 1973 ਵਿੱਚ ਫ਼ਿਲਮ ਦਾਗ ਨਾਲ ਫ਼ਿਲਮਾਂ ਵਿੱਚ ਕਦਮ ਰੱਖਣ ਵਾਲੇ ਕਾਦਰ ਖ਼ਾਨ ਨੇ 300 ਤੋਂ ਵੀ ਵੱਧ ਫ਼ਿਲਮਾਂ ਵਿੱਚ ਕੰਮ ਕੀਤਾ ਹੈ । ਪਰਦੇ ‘ਤੇ ਉਹਨਾਂ ਨੂੰ ਰੋਂਦਾ ਦੇਖ ਦਰਸ਼ਕ ਰੋਂਦੇ ਸਨ ਤੇ ਉਹਨਾਂ ਦੀ ਕਮੇਡੀ ਦੇਖ ਕੇ ਠਹਾਕੇ ਲਗਾਉਂਦੇ ਸਨ । ਉਹਨਾਂ ਦੇ ਲਿਖੇ ਡਾਈਲੌਗ ਸੁਣਕੇ ਲੋਕ ਤਾੜੀਆਂ ਵਜਾਉਂਦੇ ਸਨ ।

ਉਹਨਾਂ ਨੇ ਪਤਾ ਨਹੀਂ ਕਿੰਨੇ ਲੋਕਾਂ ਨੂੰ ਬਾਲੀਵੁੱਡ ਦਾ ਸਰਤਾਜ ਬਣਾਇਆ ਪਰ ਅਖਰੀਲੇ ਦਿਨਾਂ ਵਿੱਚ ਉਹਨਾਂ ਨੂੰ ਕੋਈ ਵੀ ਪੁੱਛਣ ਵਾਲਾ ਵੀ ਨਹੀਂ ਸੀ । 31 ਦਸੰਬਰ 2018 ਨੂੰ ਉਹਨਾਂ ਦਾ ਦਿਹਾਂਤ ਹੋ ਗਿਆ ਸੀ । ਖ਼ਬਰਾਂ ਦੀ ਮੰਨੀਏ ਤਾਂ ਦਿਹਾਂਤ ਤੋਂ ਪਹਿਲਾਂ ਕਾਦਰ ਖ਼ਾਨ ਕੋਮਾ ਵਿੱਚ ਚਲੇ ਗਏ ਸਨ । ਉਹਨਾਂ ਨੇ ਮੌਤ ਤੋਂ ਪੰਜ ਦਿਨ ਪਹਿਲਾਂ ਖਾਣਾ ਪੀਣਾ ਛੱਡ ਦਿੱਤਾ ਸੀ ।

ਆਖਰੀ ਦਿਨਾਂ ਵਿੱਚ ਕਾਦਰ ਖ਼ਾਨ ਨੇ ਬੋਲਣਾ ਬੰਦ ਕਰ ਦਿੱਤਾ ਸੀ ਉਹ ਸਿਰਫ ਅੱਖਾਂ ਦੇ ਇਸ਼ਾਰੇ ਨਾਲ ਹੀ ਕੁਝ ਸਮਝਾਉਂਦੇ ਸਨ , ਇਹੀ ਉਹਨਾਂ ਦੇ ਆਖਰੀ ਸ਼ਬਦ ਸਨ । ਕਾਦਰ ਖ਼ਾਨ ਦੇ ਦੋਸਤ ਕਹਿੰਦੇ ਸਨ ਕਿ ‘ਉਹ ਇੱਕ ਅਸਲੀ ਪਠਾਨ ਸੀ । 5 ਦਿਨ ਨਾਂ ਤਾਂ ਉਹਨਾਂ ਨੇ ਕੁਝ ਖਾਧਾ ਤੇ ਨਾ ਹੀ ਪਾਣੀ ਪੀਤਾ, ਇਸ ਦੇ ਬਾਵਜੂਦ ਉਹ 120 ਘੰਟੇ ਜਿਊਂਦੇ ਰਹੇ ।

ਇਹ ਹਰ ਕਿਸੇ ਦੇ ਵੱਸ ਦੀ ਗੱਲ ਨਹੀਂ । ਕਾਦਰ ਖ਼ਾਨ ਨੂੰ ਅਦਾਕਾਰੀ ਬਹੁਤ ਪਸੰਦ ਸੀ । ਕਾਲਜ ਦੇ ਸਮੇਂ ਉਹ ਅਦਾਕਾਰੀ ਕਰਦੇ ਸਨ । ਇੱਕ ਵਾਰ ਦਲੀਪ ਕੁਮਾਰ ਨੇ ਉਹਨਾਂ ਦੀ ਅਦਾਕਾਰੀ ਦੇਖੀ ਤਾਂ ਉਹਨਾਂ ਨੇ ਫ਼ਿਲਮ ਦਾਗ ਵਿੱਚ ਕੰਮ ਕਰਨ ਦਾ ਮੌਕਾ ਦਿੱਤਾ । ਇਸ ਫ਼ਿਲਮ ਵਿੱਚ ਉਹ ਵਕੀਲ ਦੇ ਕਿਰਦਾਰ ਵਿੱਚ ਨਜ਼ਰ ਆਏ । ਕਾਦਰ ਖ਼ਾਨ ਨੇ ਉਸ ਦੌਰ ਦੀ ਹਿੱਟ ਫ਼ਿਲਮ ਰੋਟੀ ਦੇ ਡਾਈਲੌਗ ਲਿਖੇ ਸਨ ।

ਇਸ ਫ਼ਿਲਮ ਲਈ ਮਨਮੋਹਨ ਦੇਸਾਈ ਨੇ ਉਹਨਾਂ ਨੂੰ ਇੱਕ ਲੱਖ 20 ਹਜ਼ਾਰ ਰੁਪਏ ਦਿੱਤੇ ਸਨ । ਉਸ ਜ਼ਮਾਨੇ ਵਿੱਚ ਇਹ ਬਹੁਤ ਵੱਡੀ ਰਕਮ ਸੀ । ਕਾਦਰ ਖ਼ਾਨ ਨੇ ਫ਼ਿਲਮਾਂ ਤੋਂ ਇਲਾਵਾ ਕਈ ਲੜੀਵਾਰ ਨਾਟਕਾਂ ਵਿੱਚ ਵੀ ਕੰਮ ਕੀਤਾ । ਉਹਨਾਂ ਦਾ ਸ਼ੋਅ ਹਸਨਾ ਮਤ ਬਹੁਤ ਹੀ ਪਾਪੂਲਰ ਸੀ ।