LIVE:
ਅੱਜ ਰਿਲੀਜ਼ ਨਹੀਂ ਹੋ ਸਕੇਗਾ ਸੰਨੀ ਦਿਓਲ ਦੇ ਪੁੱਤਰ ਕਰਣ ਦਿਓਲ ਦੀ ਫ਼ਿਲਮ ਦਾ ਟਰੇਲਰ,ਸੰਨੀ ਦਿਓਲ ਨੇ ਦੱਸੀ ਵਜ੍ਹਾ,ਦੇਖੋ ਵੀਡੀਓ
ਦਿਓਲ ਪਰਿਵਾਰ ਜਿਸ ਦਾ ਲੰਬੇ ਸਮੇਂ ਤੋਂ ਬਾਲੀਵੁੱਡ 'ਚ ਦਬਦਬਾ ਰਿਹਾ ਹੈ। ਹੁਣ ਤੱਕ ਇਸ ਪਰਿਵਾਰ ਦੀਆਂ 2 ਪੀੜ੍ਹੀਆਂ ਨੇ ਬਾਲੀਵੁੱਡ 'ਚ ਚੰਗਾ ਨਾਮਣਾ ਖੱਟਿਆ ਹੈ
ਤੇ ਹੁਣ ਇਸ ਪਰਿਵਾਰ ਦੀ ਤੀਸਰੀ ਪੀੜ੍ਹੀ ਵੀ ਬਾਲੀਵੁੱਡ 'ਚ ਐਂਟਰੀ ਕਰਨ ਜਾ ਰਹੀ ਹੈ। ਜੀ ਹਾਂ ਅਸੀਂ ਗੱਲ ਕਰ ਰਹੇ ਹਾਂ ਧਰਮਿੰਦਰ ਦੇ ਪੋਤੇ ਅਤੇ ਸੰਨੀ ਦਿਓਲ ਦੇ ਪੁੱਤਰ ਕਰਣ ਦਿਓਲ ਦੀ ਜਿਸ ਦੀ ਫ਼ਿਲਮ 'ਪਲ ਪਲ ਦਿਲ ਕੇ ਪਾਸ' ਜਿਹੜੀ ਕੇ 20 ਸਤੰਬਰ ਨੂੰ ਰਿਲੀਜ਼ ਹੋਣ ਜਾ ਰਹੀ ਹੈ।
ਫ਼ਿਲਮ ਦਾ ਟਰੇਲਰ ਅੱਜ ਰਿਲੀਜ਼ ਹੋਣ ਵਾਲਾ ਸੀ ਪਰ ਹੁਣ ਇਸ ਨੂੰ ਇੱਕ ਦਿਨ ਅੱਗੇ ਵਧਾ ਦਿੱਤਾ ਗਿਆ ਹੈ। ਇਸ ਦੀ ਵਜ੍ਹਾ ਵੀ ਸੰਨੀ ਦਿਓਲ ਨੇ ਖੁਦ ਸ਼ੋਸ਼ਲ ਮੀਡੀਆ 'ਤੇ ਵੀਡੀਓ ਸਾਂਝੀ ਕਰ ਦੱਸੀ ਹੈ। ਸੰਨੀ ਦਿਓਲ ਦਾ ਕਹਿਣਾ ਹੈ ਕਿ ਟਰੇਲਰ ਦਾ ਪ੍ਰੀਮੀਅਰ ਅੱਜ ਕਰਨਾ ਸੀ ਪਰ ਮੁੰਬਈ 'ਚ ਹੋ ਰਹੀ ਭਾਰੀ ਬਰਸਾਤ ਦੇ ਚਲਦਿਆਂ ਅੱਜ ਮੀਡੀਆ ਨੂੰ ਪਹੁੰਚਣ 'ਚ ਕਾਫੀ ਸਮੱਸਿਆ ਆ ਰਹੀ ਹੈ ਜਿਸ ਨੂੰ ਦੇਖਦੇ ਹੋਏ ਉਹਨਾਂ ਹੁਣ ਟਰੇਲਰ ਕੱਲ੍ਹ ਰਿਲੀਜ਼ ਕਰਨ ਲਈ ਕਿਹਾ ਹੈ।
ਪਲ ਪਲ ਦਿਲ ਕੇ ਪਾਸ ਜਿਸ ਨਾਲ ਕਰਣ ਦਿਓਲ ਡੈਬਿਊ ਕਰਨ ਜਾ ਰਹੇ ਹਨ। ਫੀਮੇਲ ਲੀਡ ਸਹਿਰ ਬਾਂਬਾ ਵੀ ਫ਼ਿਲਮ ਰਾਹੀਂ ਡੈਬਿਊ ਕਰੇਗੀ। ਸੰਨੀ ਦਿਓਲ ਵੱਲੋਂ ਡਾਇਰੈਕਟ ਕੀਤੀ ਇਹ ਫ਼ਿਲਮ ਰੋਮਾਂਟਿਕ ਡਰਾਮਾ ਹੋਣ ਵਾਲੀ ਹੈ ਜਿਸ ਦੇ ਟੀਜ਼ਰ ਨੂੰ ਵੀ ਦਰਸ਼ਕਾਂ ਵੱਲੋਂ ਕਾਫੀ ਪਸੰਦ ਕੀਤਾ ਜਾ ਰਿਹਾ ਹੈ। ਧਰਮਿੰਦਰ ਦਿਓਲ ਸਮੇਤ ਪੂਰਾ ਦਿਓਲ ਪਰਿਵਾਰ ਫ਼ਿਲਮ ਲਈ ਕਾਫੀ ਉਤਸੁਕ ਹਨ।
