ਗਾਇਕ ਅਮਰ ਸਿੰਘ ਚਮਕੀਲਾ ਦੇ ਸ਼ਾਗਿਰਦ ਤੇ ਪ੍ਰਸਿੱਧ ਗਾਇਕ ਅਵਤਾਰ ਚਮਕ ਢੋਅ ਰਿਹਾ ਹੈ ਗੁੰਮਨਾਮੀ ਦਾ ਹਨੇਰਾ, ਦਵਾਈ ਲਈ ਵੀ ਨਹੀਂ ਹਨ ਪੈਸੇ

ਗਾਇਕ ਅਮਰ ਸਿੰਘ ਚਮਕੀਲਾ ਦੇ ਸ਼ਾਗਿਰਦ ਤੇ ਪ੍ਰਸਿੱਧ ਗਾਇਕ ਅਵਤਾਰ ਚਮਕ ਏਨੀਂ ਦਿਨੀਂ ਗੁੰਮਨਾਮੀ ਦਾ ਹਨੇਰਾ ਢੋਅ ਰਹੇ ਹਨ । ਇੱਕ ਸਮਾਂ ਸੀ ਜਦੋਂ ਅਵਤਾਰ ਚਮਕ ਤੇ ਗਾਇਕਾ ਅਮਨਜੋਤ ਦੀ ਹਰ ਥਾਂ ਤੇ ਤੂੰਤੀ ਬੋਲਦੀ ਸੀ । ਇਸ ਜੋੜੀ ਨੇ ‘ਕੀ ਚਮਕੀਲਾ ਬਣਜੇਗਾ’, ‘ਬੋਲ ਚਮਕੀਲੇ ਦੇ’, ‘ਠੇਕਾ ਪਿਆਰ ਦਾ’ ਅਤੇ ‘ਸਾਂਝ ਪਿਆਰਾਂ ਦੀ’ ਵਰਗੀਆਂ 70 ਦੇ ਕਰੀਬ ਕੈਸਟਾਂ ਕੱਢਕੇ ਪੰਜਾਬੀਆਂ ਦੇ ਦਿਲਾਂ ਵਿੱਚ ਖ਼ਾਸ ਜਗ੍ਹਾ ਬਣਾਈ ਸੀ ।

ਪਰ ਜਦੋਂ ਇਹ ਜੋੜੀ ਟੁੱਟੀ ਤਾਂ ਇਹ ਦੋਹੇਂ ਗਾਇਕ ਗੁੰਮਨਾਮੀ ਦੇ ਬੱਦਲਾਂ ਹੇਠ ਗਵਾਚ ਗਏ ਹਨ । ਗਾਇਕ ਅਵਤਾਰ ਚਮਕ ਅੱਤ ਦੀ ਗਰੀਬੀ ਦਾ ਸਾਹਮਣਾ ਕਰ ਰਹੇ ਹਨ ।

ਆਪਣੀ ਮਾਂ ਮਨਜੀਤ ਕੌਰ ਨਾਲ ਬਠਿੰਡਾ ਦੇ ਮਾਡਲ ਟਾਊਨ ਵਿੱਚ ਰਹਿਣ ਵਾਲੇ ਅਵਤਾਰ ਚਮਕ ਨੂੰ ਦੋ ਵਕਤ ਦੀ ਰੋਟੀ ਦੇ ਵੀ ਲਾਲੇ ਪਏ ਹੋਏ ਹਨ । ਇੱਥੇ ਹੀ ਬਸ ਨਹੀਂ ਅਵਤਾਰ ਚਮਕ ਦੇ ਹਲਾਤ ਉਦੋਂ ਹੋਰ ਮਾੜੇ ਹੋ ਗਏ ਜਦੋਂ ਉਹ ਇੱਕ ਹਾਦਸੇ ਦਾ ਸ਼ਿਕਾਰ ਹੋ ਗਏ ।

ਇਸ ਹਾਦਸੇ ਕਰਕੇ ਉਹ ਵਿਕਲਾਂਗ ਬਣਕੇ ਰਹਿ ਗਏ ਹਨ । ਉਹਨਾਂ ਦੇ ਕੁਝ ਦੋਸਤ ਪੈਸੇ ਇੱਕਠੇ ਕਰਵਾਕੇ ਉਹਨਾਂ ਦਾ ਇਲਾਜ਼ ਕਰਵਾ ਰਹੇ ਹਨ । ਅੱਜ ਅਵਤਾਰ ਚਮਕ ਉਹ ਡੁੱਬਦਾ ਸੂਰਜ ਐ, ਜੋ ਕਿਸੇ ਸਹਾਰੇ ਨੂੰ ਉੁਡੀਕ ਰਿਹਾ।