ਮਾਂ ਬੋਲੀ ਪੰਜਾਬੀ ਦੇ ਹੱਕ 'ਚ ਅਵਾਜ਼ ਬੁਲੰਦ ਕਰਦਾ ਗੀਤ ਗਾਇਕ ਬੈਨੀ ਸਿੰਘ ਧਾਲੀਵਾਲ ਨੇ ਕੀਤਾ ਰਿਲੀਜ਼
ਪੰਜਾਬ ਦੇ ਨਾਮੀ ਗਾਇਕ ਬੈਨੀ ਸਿੰਘ ਧਾਲੀਵਾਲ ਹੁਣ ਤੱਕ ਬਹੁਤ ਸਾਰੇ ਹਿੱਟ ਗੀਤਾਂ ਨਾਲ ਦਰਸ਼ਕਾਂ ਦਾ ਮਨੋਰੰਜਨ ਕਰ ਚੁੱਕੇ ਹਨ। ਇਸ ਵਾਰ ਬੈਨੀ ਸਿੰਘ ਧਾਲੀਵਾਲ ਮਾਂ ਬੋਲੀ ਪੰਜਾਬੀ ਨੂੰ ਸਮਰਪਿਤ ਗੀਤ 'ਪੰਜਾਬੀ ਜ਼ਿੰਦਾਬਾਦ' ਲੈ ਕੇ ਦਰਸ਼ਕਾਂ ਦੇ ਰੂ-ਬ-ਰੁ ਹੋਏ ਹਨ। ਪਿਛਲੇ ਕਾਫੀ ਸਮੇਂ ਤੋਂ ਸੋਸ਼ਲ ਮੀਡੀਆ 'ਤੇ ਪੰਜਾਬੀ ਭਾਸ਼ਾ ਨੂੰ ਲੈ ਕੇ ਕਾਫੀ ਵਿਵਾਦ ਸਾਹਮਣੇ ਆਏ ਹਨ। ਬਹੁਤ ਸਾਰੇ ਕਲਾਕਾਰਾਂ ਅਤੇ ਗਾਇਕਾਂ ਨੇ ਇਸ ਮੁੱਦੇ 'ਤੇ ਬੇਬਾਕੀ ਨਾਲ ਅਵਾਜ਼ ਚੁੱਕੀ ਹੈ। ਇਸ ਨੂੰ ਹੀ ਦੇਖਦੇ ਹੋਏ ਬੈਨੀ ਧਾਲੀਵਾਲ ਨੇ ਪੰਜਾਬੀ ਲਈ ਇਹ ਗੀਤ ਗਾਇਆ ਹੈ।
ਗਾਣਾ ਸਾਂਝਾ ਕਰਦੇ ਹੋਏ ਗਾਇਕ ਨੇ ਸੋਸ਼ਲ ਮੀਡੀਆ 'ਤੇ ਲਿਖਿਆ,"ਮੈਂ ਅੱਜ ਤੱਕ ਇਹ ਗੱਲ ਕਿਸੇ ਨੂੰ ਜ਼ਿਆਦਾ ਜ਼ੋਰ ਪਾ ਕੇ ਨਹੀਂ ਕਹੀ ਕਿ ਮੇਰਾ ਕੋਈ ਗਾਣਾ ਆ ਰਿਹਾ ਤੇ ਇਹਨੂੰ ਸਾਂਝਾ ਕਰੋ ਪਰ ਜਿਸ ਦਿਨ ਦਾ ਸਾਡੀ ਬੋਲੀ ਪੰਜਾਬੀ ਨੂੰ ਲੈ ਕੇ ਕਾਫੀ ਵਿਵਾਦ ਛਿੜਿਆ ਉਸ ਦਿਨ ਦਾ ਇਹ ਹੀ ਸੋਚਦਾ ਸੀ ਕਿਸਨੂੰ ਕੀ ਕਹੀਏ ਤੇ ਕਿਸਨੂੰ ਨਾ ਕਹੀਏ ਤੇ ਅੱਜ ਮੈਂ ਇਹ ਗੱਲ ਸਾਰੀ ਦੁਨੀਆ ਵਿਚ ਵੱਸਦੇ ਪੰਜਾਬੀਆਂ ਨੂੰ ਕਹਿਣਾ ਚਾਹੁੰਗਾ ਕਿ ਇਹ ਗਾਣਾ ਮੈਂ ਆਪਣੀ ਮਾਂ ਪੰਜਾਬੀ ਨੂੰ ਸਮਰਪਿਤ ਕਰਨਾ ਚਹੁੰਦਾ ਹਾਂ ਤੇ ਤੁਸੀਂ ਸਾਰਿਆਂ ਨੇ ਜ਼ਰੂਰ ਸੁਣਨਾ।"
"ਇਸ ਗਾਣੇ ਦਾ ਮਕਸਦ ਆਪਣੇ ਆਪ ਨੂੰ ਅੱਗੇ ਲਿਆਉਣ ਦਾ ਜਾਂ ਵਾਹ ਵਾਹੀ ਲੈਣਾ ਨਹੀਂ ਬਸ ਆਪਣੀ ਬੋਲੀ ਨੂੰ ਅੱਗੇ ਲੈ ਕੇ ਜਾਈਏ ਇਹ ਸਾਰਿਆਂ ਦਾ ਫਰਜ਼ ਬਣਦਾ ਤੇ ਇਹ ਮੈਸੇਜ ਹੈ ਮੇਰੇ ਸਾਰੇ ਪੰਜਾਬੀ ਭੈਣ ਭਰਾਵਾਂ ਨੂੰ ਕਿ ਜਿੰਨ੍ਹਾਂ ਸਮਾਂ ਤੁਹਾਡੇ ਦਿਲ ਵਿਚ ਆਪਣੀ ਮਾਂ ਬੋਲੀ ਲਈ ਕਦਰ ਹੈ ਜਿੰਨ੍ਹਾਂ ਸਮਾਂ ਤੁਸੀਂ ਆਪ ਬੋਲਦੇ ਤੇ ਆਪਣੇ ਬੱਚਿਆਂ ਨੂੰ ਸਿਖਾਉਂਦੇ ਰਹੋਗੇ ਉਨ੍ਹਾਂ ਸਮਾਂ ਕਿਸੇ ਦੀ ਹਿੰਮਤ ਨਹੀਂ ਕਿ ਆਪਣੇ ਤੋਂ ਕੋਈ ਆਪਣੀ ਮਾਂ ਬੋਲੀ ਪੰਜਾਬੀ ਖੋਹ ਸਕੇ,ਪੰਜਾਬੀ ਜ਼ਿੰਦਾਬਾਦ"।
ਹੋਰ ਵੇਖੋ : ਇਹਨਾਂ ਪੰਜਾਬੀ ਸਿਤਾਰਿਆਂ ਨੇ ਸ਼ਹੀਦ ਭਗਤ ਸਿੰਘ ਨੂੰ ਜਨਮ ਦਿਹਾੜੇ 'ਤੇ ਕੀਤਾ ਯਾਦ
ਦੱਸ ਦਈਏ ਬੈਨੀ ਧਾਲੀਵਾਲ ਨੇ ਇਸ ਗੀਤ ਦਾ ਲਿਰਿਕਲ ਵੀਡੀਓ ਯੂ ਟਿਊਬ 'ਤੇ ਰਿਲੀਜ਼ ਕੀਤਾ ਹੈ ਜਿਸ 'ਚ ਸੁਨੇਹਾ ਦਿੱਤਾ ਗਿਆ ਹੈ ਕਿ ਅਸੀਂ ਹੋਰ ਕੋਈ ਭਾਸ਼ਾ ਸਿਖੀਏ ਜਾਂ ਨਹੀਂ ਪਰ ਪੰਜਾਬੀ ਸਾਥੋਂ ਕਦੇ ਕੋਈ ਨਹੀਂ ਖੋਹ ਸਕਦਾ। ਗੀਤ ਦੇ ਬੋਲ ਜੋਨੀ ਕੌਸ਼ਲ ਦੇ ਹਨ ਅਤੇ ਸੰਗੀਤ ਬੈਨੀ ਸਿੰਘ ਧਾਲੀਵਾਲ ਨੇ ਖੁਦ ਤਿਆਰ ਕੀਤਾ ਹੈ।