ਦਿੱਲੀ ਦਾ ਰਹਿਣ ਵਾਲਾ ਮਹਿੰਦਰ ਸਿੰਘ ਬਣਿਆ ਕੁਝ ਲੋਕਾਂ ਲਈ ਮਸੀਹਾ, ਇਸ ਕੰਮ ਕਰਕੇ ਹਰ ਪਾਸੇ ਹੋ ਰਹੀ ਹੈ ਚਰਚਾ

ਦਿੱਲੀ ਵਿੱਚ ਹੋਈ ਹਿੰਸਾ ਦੌਰਾਨ ਮਨੁੱਖਤਾ ਨੂੰ ਸ਼ਰਮਸਾਰ ਕਰਨ ਵਾਲੀਆਂ ਕਈ ਘਟਨਾਵਾਂ ਹੋਈਆਂ ਹਨ । ਜਾਨ ਮਾਲ ਦਾ ਬਹੁਤ ਨੁਕਸਾਨ ਹੋਇਆ ਹੈ ਪਰ ਇਸ ਸਭ ਦੇ ਚਲਦੇ ਕੁਝ ਲੋਕ ਅਜਿਹੇ ਵੀ ਸਨ ਜਿਹੜੇ ਕੁਝ ਲੋਕਾਂ ਲਈ ਮਸੀਹਾ ਬਣੇ ਤੇ ਕੁਝ ਲੋਕਾਂ ਲਈ ਮਿਸਾਲ । ਮਹਿੰਦਰ ਸਿੰਘ ਤੇ ਇੰਦਰਜੀਤ ਸਿੰਘ ਉਹ ਦੋ ਨਾਂਅ ਹਨ ਜਿੰਨ੍ਹਾ ਨੇ ਹਿੰਸਾ ਦੌਰਾਨ ਨਾ ਸਿਰਫ਼ ਲੋਕਾਂ ਦੀ ਜਾਨ ਬਚਾਈ ਬਲਕਿ ਉਹਨਾਂ ਦੀ ਰੱਖਿਆ ਵੀ ਕੀਤੀ । ਖ਼ਬਰਾਂ ਦੀ ਮੰਨੀਏ ਤਾਂ ਮਹਿੰਦਰ ਸਿੰਘ ਤੇ ਇੰਦਰਜੀਤ ਸਿੰਘ ਰਿਸ਼ਤੇ ਵਿੱਚ ਪਿਤਾ ਪੁੱਤਰ ਹਨ ।

ਇਸ ਸਿੱਖ ਪਿਉ ਪੁੱਤਰ ਦੀ ਜੋੜੀ ਨੇ 60 ਤੋਂ 80 ਲੋਕਾਂ ਨੂੰ ਹਿੰਸਾ ਦੌਰਾਨ ਸੁਰੱਖਿਅਤ ਸਥਾਨਾਂ ਤੇ ਪਹੁੰਚਾਇਆ । ਇਸ ਲਈ ਦੋਹਾਂ ਨੇ ਆਪਣਾ ਬਾਈਕ ਤੇ ਸਕੂਟੀ ਦੀ ਵਰਤੋਂ ਕੀਤੀ । ਦੋਹਨਾਂ ਨੇ ਦੱਸਿਆ ਕਿ ‘ਉਤਰ-ਪੂਰਵੀ ਦਿੱਲੀ ਵਿੱਚ ਹਲਾਤ ਵਿਗੜਦੇ ਜਾ ਰਹੇ ਸਨ । ਉਹਨਾਂ ਦੇ ਗੁਆਂਢੀ ਕਾਫੀ ਡਰੇ ਹੋਏ ਸਨ । ਅਜਿਹੇ ਹਲਾਤਾਂ ਨੂੰ ਦੇਖਦੇ ਹੋਏ ਉਹਨਾਂ ਨੇ ਇੱਕ ਭਾਈਚਾਰੇ ਦੇ ਲੋਕਾਂ ਨੂੰ ਕਦਰਮਪੁਰੀ ਇਲਾਕੇ ਵਿੱਚ ਲਿਜਾਣਾ ਸ਼ੁਰੂ ਕਰ ਦਿੱਤਾ’ ।

ਮਹਿੰਦਰ ਸਿੰਘ ਨੇ ਦੱਸਿਆ ‘ਉਹਨਾਂ ਤੇ ਉਹਨਾਂ ਦੇ ਬੇਟੇ ਇੰਦਰਜੀਤ ਨੇ ਇੱਕ ਘੰਟੇ ਵਿੱਚ ਗੋਕੁਲਪੁਰੀ ਤੋਂ ਕਦਰਮਪੁਰੀ ਵਿੱਚ 20 ਗੇੜੇ ਲਗਾਏ । ਉਹ ਦੋਵੇਂ ਆਪਣੀ-ਆਪਣੀ ਸਵਾਰੀ ਤੇ ਲੋਕਾਂ ਨੂੰ ਬਿਠਾਉਂਦੇ ਤੇ ਸੁਰੱਖਿਅਤ ਥਾਂ ਤੇ ਛੱਡ ਆਉਂਦੇ । ਕੁਝ ਲੋਕਾਂ ਦੀ ਪਹਿਚਾਣ ਛਿਪਾਉਣ ਲਈ ਉਹਨਾਂ ਨੇ ਪੱਗਾਂ ਵੀ ਬੰਨੀਆਂ’ । ਤੁਹਾਨੂੰ ਦੱਸ ਦਿੰਦੇ ਹਾਂ ਕਿ ਮਹਿੰਦਰ ਸਿੰਘ ਦੋ ਬੱਚਿਆਂ ਦੇ ਪਿਤਾ ਹਨ ਤੇ ਇੰਲੈਕਟ੍ਰਾਨਿਕ ਸਮਾਨ ਦੀ ਦੁਕਾਨ ਚਲਾਉਂਦੇ ਹਨ ।