‘ਸਟ੍ਰੀਟ ਡਾਂਸ ਥ੍ਰੀਡੀ’ ਦੇ ਨਵੇਂ ਗੀਤ ਨੂੰ ਲੱਗਿਆ ਮਿਲਿੰਦ ਗਾਬਾ ਦੀ ਆਵਾਜ਼ ਦਾ ਤੜਕਾ, ‘ਨੱਚੀ ਨੱਚੀ’ ਗਾਣਾ ਛਾਇਆ ਟਰੈਂਡਿੰਗ ‘ਚ, ਦੇਖੋ ਵੀਡੀਓ
ਪਿਛਲੇ ਹਫ਼ਤੇ ਰਿਲੀਜ਼ ਹੋਈ ਫ਼ਿਲਮ ‘ਸਟ੍ਰੀਟ ਡਾਂਸ ਥ੍ਰੀਡੀ’ ਦਾ ਇੱਕ ਹੋਰ ਨਵਾਂ ਗੀਤ ਇੰਟਰਨੈੱਟ ਉੱਤੇ ਰਿਲੀਜ਼ ਹੋ ਚੁੱਕਿਆ ਹੈ। ਨੱਚੀ ਨੱਚੀ (Nachi Nachi) ਟਾਈਟਲ ਹੇਠ ਰਿਲੀਜ਼ ਹੋਏ ਇਸ ਗੀਤ ਨੂੰ ਵੀ ਪੰਜਾਬੀ ਤੜਕਾ ਲਗਾਇਆ ਗਿਆ ਹੈ। ਜੀ ਹਾਂ ਇਸ ਗੀਤ ਨੂੰ ਪੰਜਾਬੀ ਰੈਪਰ ਤੇ ਗਾਇਕ ਮਿਲਿੰਦ ਗਾਬਾ ਦੀ ਆਵਾਜ਼ ਦਾ ਤੜਕਾ ਲਗਾਇਆ ਗਿਆ ਤੇ ਉਨ੍ਹਾਂ ਦੇ ਨਾਲ ਗਾਇਕੀ ‘ਚ ਸਾਥ ਦਿੱਤਾ ਹੈ ਨਿਤੀ ਮੋਹਨ ਤੇ ਧਵਨੀ ਭਾਨੂਸ਼ਾਲੀ ਹੋਰਾਂ ਨੇ।
ਜੇ ਗੱਲ ਕਰੀਏ ਗਾਣੇ ਦੇ ਬੋਲਾਂ ਦੀ ਤਾਂ ਮਿਲਿੰਦ ਗਾਬਾ ਤੇ ਅਸਲੀ ਗੋਲਡ ਨੇ ਮਿਲਕੇ ਲਿਖੇ ਨੇ। ਇਸ ਗੀਤ ਨੂੰ ਟੀਸੀਰੀਜ਼ ਦੇ ਲੇਬਲ ਹੇਠ ਰਿਲੀਜ਼ ਕੀਤਾ ਗਿਆ ਹੈ। ਇਸ ਗਾਣੇ ‘ਚ ਵਰੁਣ ਧਵਨ, ਸ਼ਰਧਾ ਕਪੂਰ ਤੇ ਨੋਰਾ ਫਤੇਹੀ ਦਾ ਸ਼ਾਨਦਾਰ ਡਾਂਸ ਦੇਖਣ ਨੂੰ ਮਿਲ ਰਿਹਾ ਹੈ। ਜਿਸਦੇ ਚੱਲਦੇ ਗਾਣੇ ਨੂੰ ਸੋਸ਼ਲ ਮੀਡੀਆ ਉੱਤੇ ਸ਼ਾਨਦਾਰ ਰਿਸਪਾਂਸ ਮਿਲ ਰਿਹਾ ਹੈ ਤੇ ਗੀਤ ਟਰੈਂਡਿੰਗ ‘ਚ ਛਾਇਆ ਹੋਇਆ ਹੈ।
ਜੇ ਗੱਲ ਕਰੀਏ ਮਿਲਿੰਦ ਗਾਬਾ ਦੀ ਤਾਂ ਉਹ ਪੰਜਾਬੀ ਮਿਊਜ਼ਿਕ ਇੰਡਸਟਰੀ ਨੂੰ ਕਈ ਸ਼ਾਨਦਾਰ ਗੀਤ ਦੇ ਚੁੱਕੇ ਨੇ ਜਿਵੇਂ ਨਜ਼ਰ ਯਾਰ ਮੋੜ ਦੋ, ਲੱਗ ਜਾਏਗੀ, ਮੈਂ ਤੇਰੀ ਹੋ ਗਈ, ਜ਼ਰਾ ਪਾਸ ਆਓ, ਕਲੇਸ਼, ਸੋਹਣਾ 2 ਵਰਗੇ ਕਈ ਗੀਤ ਦਰਸ਼ਕਾਂ ਦੀ ਝੋਲੀ ਪੈ ਚੁੱਕੇ ਹਨ। ਇਸ ਤੋਂ ਇਲਾਵਾ ਕਈ ਬਾਲੀਵੁੱਡ ਫ਼ਿਲਮਾਂ ‘ਚ ਵੀ ਆਪਣੇ ਰੈਪ ਦਾ ਤੜਕਾ ਲਗਾ ਚੁੱਕੇ ਹਨ।