ਜਦੋਂ ਬੱਬਲ ਰਾਏ ਨੂੰ ਪਹਿਲੀ ਵਾਰ ਮਿਲਿਆ ਸੀ ਯੁਵਰਾਜ ਸਿੰਘ ਨਾਲ ਖੇਡਣ ਦਾ ਮੌਕਾ, ਸਾਹਮਣੇ ਆਈ ਤਸਵੀਰ
ਜਦੋਂ ਬੱਬਲ ਰਾਏ ਨੂੰ ਪਹਿਲੀ ਵਾਰ ਮਿਲਿਆ ਸੀ ਯੁਵਰਾਜ ਸਿੰਘ ਨਾਲ ਖੇਡਣ ਦਾ ਮੌਕਾ, ਸਾਹਮਣੇ ਆਈ ਤਸਵੀਰ : 10 ਜੂਨ ਨੂੰ ਕੌਮੀ ਕ੍ਰਿਕੇਟ ਖ਼ਿਡਾਰੀ ਯੁਵਰਾਜ ਸਿੰਘ ਹੋਰਾਂ ਨੇ ਕ੍ਰਿਕੇਟ ਤੋਂ ਸੰਨਿਆਸ ਲੈ ਲਿਆ। ਹਰ ਕਿਸੇ ਵੱਲੋਂ ਯੁਵਰਾਜ ਸਿੰਘ ਦਾ ਕ੍ਰਿਕੇਟ ਲਈ ਪਾਏ ਮਹਾਨ ਯੋਗਦਾਨ ਦਾ ਧੰਨਵਾਦ ਕੀਤਾ ਗਿਆ ਅਤੇ ਅੱਗੇ ਦੀ ਜ਼ਿੰਦਗੀ ਲਈ ਸ਼ੁਭਕਾਮਨਾਵਾਂ ਦਿੱਤੀਆਂ ਗਈਆਂ। ਪੰਜਾਬੀ ਇੰਡਸਟਰੀ ਦੇ ਵੀ ਕਈ ਸਿਤਾਰਿਆਂ ਦੀਆਂ ਯੁਵਰਾਜ ਸਿੰਘ ਦੀ ਸ਼ਾਨਦਾਰ ਖੇਡ ਨੂੰ ਯਾਦ ਕਰਦੇ ਹੋਏ ਵੱਖ ਵੱਖ ਪ੍ਰਤੀਕ੍ਰਿਆਵਾਂ ਆਈਆਂ।
ਉੱਥੇ ਹੀ ਗਾਇਕ ਅਤੇ ਅਦਾਕਾਰ ਬੱਬਲ ਰਾਏ ਨੇ ਵੀ ਯੁਵਰਾਜ ਸਿੰਘ ਨਾਲ ਇੱਕ ਤਸਵੀਰ ਸਾਂਝੀ ਕਰਦੇ ਹੋਏ ਉਹਨਾਂ ਨਾਲ ਬਿਤਾਏ ਕੁਝ ਪਲ ਯਾਦ ਕੀਤੇ। ਇਹ ਤਸਵੀਰ 2004 ਦੀ ਹੈ ਜਿਸ 'ਚ ਯੁਵਰਾਜ ਸਿੰਘ ਦੇ ਪਿੱਛੇ ਖੜੇ ਬੱਬਲ ਰਾਏ ਨਜ਼ਰ ਆ ਰਹੇ ਹਨ। ਬੱਬਲ ਰਾਏ ਹੋਰਾਂ ਦਾ ਕਹਿਣਾ ਹੈ "ਜਦੋਂ ਮੈਂ ਯੁਵਰਾਜ ਸਿੰਘ ਨੂੰ 2004 'ਚ ਪਹਿਲੀ ਵਾਰ ਮਿਲਿਆ ਸੀ, ਅਤੇ ਨੈੱਟ 'ਚ ਉਹਨਾਂ ਨੂੰ ਬਾਲ ਕਰਵਾਉਣ ਦਾ ਮੌਕਾ ਵੀ ਮਿਲਿਆ ਸੀ। ਮੇਰੀ ਦਿੱਖ ਵੱਲ ਧਿਆਨ ਨਾਂ ਦਿਓ।"
ਦੱਸ ਦਈਏ ਯੁਵਰਾਜ ਸਿੰਘ 40 ਟੈਸਟ, 308 ਇੱਕ ਦਿਨਾਂ ਤੇ 58 ਟੀ-2੦ ਮੈਚ ਖੇਡ ਚੁੱਕੇ ਹਨ। ਟੈਸਟ ਕ੍ਰਿਕੇਟ ਵਿੱਚ ਯੁਵਰਾਜ ਨੇ 33.92 ਦੀ ਔਸਤ ਨਾਲ 19੦੦ ਦੌੜਾਂ ਬਣਾਈਆਂ ਹਨ, ਉੱਥੇ ਹੀ ਇੱਕ ਦਿਨਾਂ ਮੈਚ ਵਿੱਚ ਯੁਵਰਾਜ ਨੇ 8701 ਦੌੜਾਂ ਬਣਾਈਆਂ ਹਨ। ਟੀ-2੦ ਕ੍ਰਿਕੇਟ ਵਿੱਚ ਯੁਵਰਾਜ ਨੇ 1177 ਦੌੜਾਂ ਬਣਾਈਆਂ ਹਨ।ਚੰਡੀਗੜ੍ਹ ਦੇ ਜੰਮਪਲ ਅਤੇ ਪੰਜਾਬੀ ਫ਼ਿਲਮਾਂ ਦੇ ਦਮਦਾਰ ਅਦਾਕਾਰ ਯੋਗਰਾਜ ਸਿੰਘ ਦੇ ਪੁੱਤਰ ਯੁਵਰਾਜ ਸਿੰਘ ਵੱਲੋਂ ਕ੍ਰਿਕੇਟ ਦੀ ਖੇਡ 'ਚ ਦਿੱਤੇ ਮਹਾਨ ਯੋਗਦਾਨ ਲਈ ਪੂਰਾ ਦੇਸ਼ ਉਹਨਾਂ ਦਾ ਧੰਨਵਾਦ ਕਰ ਰਿਹਾ ਹੈ।