ਤਪਦੀ ਧੁੱਪ ‘ਚ ਪਲਾਈਨ ਕਰ ਰਹੇ ਪ੍ਰਵਾਸੀ ਮਜ਼ਦੂਰਾਂ ਦੀ ਖਾਲਸਾ ਏਡ ਕੁਝ ਇਸ ਤਰ੍ਹਾਂ ਕਰ ਰਹੀ ਹੈ ਮਦਦ, ਦੇਖੋ ਵੀਡੀਓ
ਦੇਸ਼ ‘ਚ ਲਾਕਡਾਊਨ ਦੇ ਕਾਰਨ ਪ੍ਰਵਾਸੀ ਮਜ਼ਦੂਰਾਂ ਨੂੰ ਕਾਫੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ । ਜਿਸਦੇ ਚਲਦੇ ਵੱਡੀ ਗਿਣਤੀ ‘ਚ ਪ੍ਰਵਾਸੀ ਮਜ਼ਦੂਰ ਆਪੋ ਆਪਣੇ ਘਰਾਂ ਵੱਲ ਮੁੜਣ ਲਈ ਮਜ਼ਬੂਰ ਨੇ । ਵੱਡੀ ਗਿਣਤੀ ‘ਚ ਵੱਖੋ ਵੱਖ ਰਾਜਾਂ ਤੋਂ ਪ੍ਰਵਾਸੀ ਮਜ਼ਦੂਰ ਯੂ.ਪੀ ਤੇ ਬਿਹਾਰ ਵੱਲ ਨੂੰ ਪੈਦਲ ਜਾਂ ਫਿਰ ਸਾਇਕਲਾਂ ਰਾਹੀਂ ਨਿਕਲ ਪਏ ਨੇ । ਮਈ ਦੀ ਤਪਦੀ ਧੁੱਪ ਏਨਾ ਲੰਬਾ ਸਫਰ ਤੈਅ ਕਰਨ ਬਹੁਤ ਮੁਸ਼ਕਿਲ ਹੈ ।
ਜਿਸਦੇ ਚੱਲਦੇ ਪੂਰੀ ਦੁਨੀਆ ‘ਚ ਆਪਣੀਆਂ ਸੇਵਾਵਾਂ ਦੇਣ ਵਾਲੀ ਖਾਲਸਾ ਏਡ ਦੇ ਮੈਂਬਰ ਲਗਾਤਾਰ ਲੋਕਾਂ ਦੀ ਸੇਵਾ ‘ਚ ਜੁਟੇ ਹੋਏ ਨੇ । ਇਨ੍ਹਾਂ ਮਜ਼ਦੂਰਾਂ ਦੀ ਮਦਦ ਲਈ ਵੀ ਖਾਲਸਾ ਏਡ ਅੱਗੇ ਆਈ ਹੈ । ਉਨ੍ਹਾਂ ਨੇ ਭੁੱਖ ਭਾਣੇ ਮਜ਼ਦੂਰਾਂ ਦੇ ਲਈ ਦਿਲੀ ਦੇ ਨੈਸ਼ਨਲ ਹਾਈਵੇ ਉੱਤੇ ਭੋਜਨ ਦਾ ਪ੍ਰਬੰਧ ਕੀਤਾ ਹੈ । ਉਹ ਉੱਥੋਂ ਲੰਘਣ ਵਾਲੇ ਸਾਰੇ ਹੀ ਪ੍ਰਵਾਸੀ ਮਜ਼ਦੂਰਾਂ ਨੂੰ ਭੋਜਨ ਖਵਾ ਰਹੇ ਨੇ । ਖਾਲਸਾ ਏਡ ਨੇ ਦੇਸ਼ਵਾਸੀਆਂ ਨੂੰ ਵੀ ਅਪੀਲ ਕੀਤੀ ਹੈ ਇਸ ਮੁਸ਼ਕਿਲ ਸਮੇਂ ‘ਚ ਲੋੜਵੰਦ ਲੋਕਾਂ ਦੀ ਸਹਾਇਤਾ ਜ਼ਰੂਰ ਕਰੋ ।
ਦੱਸ ਦਈਏ ਕੋਰੋਨਾ ਵਾਇਰਸ ਨੇ ਪੂਰੀ ਦੁਨੀਆ ‘ਚ ਕਹਿਰ ਮਚਾਇਆ ਹੋਇਆ ਹੈ । ਇਸ ਮਹਾਂਮਾਰੀ ਨੇ ਲੱਖਾਂ ਹੀ ਲੋਕਾਂ ਦੀ ਜਾਨਾਂ ਲੈ ਲਈਆਂ ਨੇ । ਬਾਕੀ ਦੇਸ਼ਾਂ ਵਾਂਗ ਇੰਡੀਆ ‘ਚ ਵੀ ਲਾਕਡਾਊਨ ਚੱਲ ਰਿਹਾ ਹੈ ।