ਇਨ੍ਹਾਂ ਘਰੇਲੂ ਤਰੀਕਿਆਂ ਦੇ ਨਾਲ ਦੂਰ ਕਰੋ ਕੱਪੜਿਆਂ ‘ਤੇ ਲੱਗੇ ਸਿਆਹੀ ਦੇ ਦਾਗਾਂ ਨੂੰ

ਸਿਆਹੀ ਦੇ ਦਾਗ ਅਜਿਹੇ ਨੇ ਜੋ ਕੱਪੜੇ ‘ਤੇ ਪੈ ਜਾਣ ਤਾਂ ਕਈ ਵਾਰ ਧੋਣ ਦੇ ਬਾਵਜੂਦ ਵੀ ਦੂਰ ਨਹੀਂ ਹੁੰਦੇ । ਵਿਦਿਆਰਥੀ ਤੇ ਦਫਤਰਾਂ 'ਚ ਕੰਮ ਕਰਨ ਵਾਲੇ ਲੋਕਾਂ ਦੇ ਕੱਪੜਿਆਂ 'ਤੇ ਸਿਆਹੀ ਦੇ ਨਿਸ਼ਾਨ ਲੱਗਣਾ ਆਮ ਜਿਹੀ ਗੱਲ ਹੈ । ਜਿਸ ਕਰਕੇ ਕੱਪੜੇ ਸਿਆਹੀ ਦੇ ਦਾਗ ਦੇ ਨਾਲ ਖਰਾਬ ਹੋ ਜਾਂਦੇ ਹਨ ।    ਸਿਆਹੀ ਦੇ ਦਾਗ ਹਟਾਉਣ ਲਈ ਲੋਕ ਬਾਜ਼ਾਰ 'ਤੋਂ ਮਹਿੰਗੇ ਪ੍ਰਾਡਕਟਸ ਲੈ ਕੇ ਆਉਂਦੇ ਹਨ, ਜਿਸ 'ਚ ਬਹੁਤ ਸਾਰੇ ਪੈਸੇ ਲੱਗ ਜਾਂਦੇ ਹਨ । ਘੱਟ ਪੈਸਿਆਂ 'ਚ ਘਰੇਲੂ ਤਰੀਕਿਆਂ ਨਾਲ ਬਿਨਾ ਕਿਸੇ ਪ੍ਰੇਸ਼ਾਨੀ ਤੋਂ ਦਾਗਾਂ ਨੂੰ ਦੂਰ ਕੀਤਾ ਜਾ ਸਕਦਾ ਹੈ । ਆਓ ਜਾਣਦੇ ਹਾਂ ਕੁਝ ਘਰੇਲੂ ਨੁਸਖ਼ਿਆਂ ਬਾਰੇ:-

ਲੂਣ- ਜੇ ਤੁਹਾਡੇ ਕਪੜੇ ‘ਤੇ ਸਿਆਹੀ ਵਾਲਾ ਦਾਗ ਪੈ ਗਿਆ ਹੈ ਤਾਂ ਦਾਗ ਵਾਲੀ ਥਾਂ 'ਤੇ ਲੂਣ ਲਗਾਓ । ਫਿਰ ਇਸ ਨੂੰ ਗਿੱਲੇ ਟਿਸ਼ੂ ਅਤੇ ਬਰੱਸ਼ ਦੇ ਨਾਲ ਸਾਫ ਕਰੋ । ਅਜਿਹਾ ਕੁਝ ਦੇਰ ਤੱਕ ਕਰੋਂ ਸਿਆਹੀ ਦਾ ਨਿਸ਼ਾਨ ਸਾਫ ਹੋ ਜਾਵੇਗਾ।

ਨੇਲ ਪੇਂਟ ਰਿਮੂਵਰ- ਨੇਲ ਪੇਂਟ ਰਿਮੂਵਰ ਦੇ ਨਾਲ ਦਾਗ ਦੂਰ ਕਰਨ ਦੇ ਲਈ ਰੂੰ ਨੂੰ ਰਿਮੂਵਰ 'ਚ ਡੁਬਾਓ ਲਓ । ਫਿਰ ਇਸ ਰਿਮੂਵਰ ਵਾਲੀ ਰੂੰ ਨੂੰ ਦਾਗ ਉੱਤੇ ਰਗੜੋ । ਇਸ ਤੋਂ ਬਾਅਦ ਪਾਣੀ ਨਾਲ ਦਾਗਾਂ ਨੂੰ ਸਾਫ ਕਰੋ।

ਟੂਥਪੇਸਟ- ਕੱਪੜਿਆਂ 'ਤੇ ਲੱਗੀ ਸਿਆਹੀ ਦੇ ਦਾਗ ਦੂਰ ਕਰਨ ਦੇ ਲਈ ਟੂਥਪੇਸਟ ਸਭ ਤੋਂ ਚੰਗਾ ਘਰੇਲੂ ਨੁਸਖਾ ਹੈ । ਇਸ ਲਈ ਬਿਨਾ ਜੈੱਲ ਵਾਲਾ ਟੂਥਪੇਸਟ ਲਓ । ਟੂਥਪੇਸਟ ਨੂੰ ਉੱਥੇ ਲਗਾਓ ਜਿੱਥੇ ਸਿਆਹੀ ਦੇ ਦਾਗ ਲੱਗੇ ਹੋਣ । ਫਿਰ ਇਸ ਨੂੰ ਸੁੱਕਣ ਦਿਓ । ਜਦੋਂ ਟੂਥਪੇਸਟ ਚੰਗੀ ਤਰ੍ਹਾਂ ਨਾਲ ਸੁੱਕ ਜਾਵੇ ਤਾਂ ਉਸ ਨੂੰ ਕਿਸੇ ਵੀ ਡਿਟਰਜੈਂਟ ਨਾਲ ਧੋ ਲਓ।

ਕੋਰਨ ਸਟਾਰਚ- ਸਭ ਤੋਂ ਪਹਿਲਾਂ ਕੋਰਨ ਸਟਾਰਚ ਨੂੰ ਦੁੱਧ 'ਚ ਮਿਕਸ ਕਰ ਲਓ। ਫਿਰ ਇਸ ਪੇਸਟ ਨੂੰ ਦਾਗ 'ਤੇ ਲਗਾ ਕੇ ਛੱਡ ਦਿਓ । ਕੁਝ ਮਿੰਟਾਂ ਬਾਅਦ ਬਰੱਸ਼ ਨਾਲ ਸਾਫ ਕਰ ਲਓ । ਇਸ ਤਰ੍ਹਾਂ ਨਾਲ ਕੁਝ ਮਿੰਟ 'ਚ ਆਸਾਨੀ ਨਾਲ ਦਾਗ ਸਾਫ ਕੀਤੇ ਜਾ ਸਕਦੇ ਹਨ ।